Dolnoserbski gymnazium jo se załožył 1. septembra 1952 ako „Serbska wuša šula“. Na iniciatiwu dr. Frida Mětška jo pśišło 76 wuknicow a wuknikow a 8 ceptarkow a ceptarjow z gornoserbskego Budyšyna do Chóśebuza. Wóni su do twarjenja něgajšnego wucabnikojskego seminara na Žylojskej droze zapśěgnuli. Prědny lětnik jo 1954 wótpołožył abituru, tencas hyšći w gornoserbskej rěcy.

Wót zachopjeńka sem jo serbska kultura wjeliku rolu w šulskem žywjenju grała. Južo prědny lětnik našeje šule jo wustupił z kulturnym programom w Chóśebuzu. W šuli stej se w tom casu załožyłej chor a rejowańska kupka. Na zachopjeńku 60tych lět su se natwarili šulske partnarstwa z šulami w Pólskej a Českej. Prědny zgromadny sportowy swěźeń jo se wótměwał 1967.