Dolnoserbski Gymnazium

Wósebny wjerašk caka wałtoru, dnja 26.01.2010 na wuknikow a wuknice 11. lětnika Dolnoserbskego gymnaziuma Chóśebuz.

Na tom dnju mógu wóni serbske stawizny nic jano z knigłow wuknuś, ale dožywiś a to w engelskej rěcy. Pśicyna za to jo, až budu gósći z Teksasa na tom dnju wulicowaś wó wudrogowanju swójich Hochoskich prědownikow do Teksasa w 19. stolěśu a wó familijowych stawiznach. Mimo togo kśě do rozgrona pśiś z gymnaziastami a myslenja k tomu wuměnaś abo diskutěrowaś.

Pśi wuslěźenju familijowych stawiznow su Amerikanarje póznali swóje serbske kórjenje a woglědaju zasej raz k domowni swójich swójźbnych.

Glucny pśipad pśi tom jo, až Serbski muzej na Młyńskej droze w měsće rowno k tej temje jadnu wustajeńcu pokažo. Tak buźo 11. lětnik pó rozgronje z Amerikanarjami teke k toś tej wustajeńcy woglědaś.

Až woplěwanje serbskich nałogow wjerašk w kuždem šulskem lěśe na Dolnoserbskem gymnaziumje jo, to pokažu dnja 28.01.2010 wukniki a wuknice našeje šule 13. lětnika zasej na Zapusće.

Južo 24. raz wótměwa se tradicionelny Zapust. 23 pórikow našeje šule zapustuju na tom dnju pśez město. Źowća nose serbsku swěźeńsku drastwu, kapała zagrajo muziku a z rejami kśě zymu wugnaś. Mimo togo se wuźěkuju pśi tej góźbje pla sponsorow a pódpěrowarjow našogo gymnaziuma.

Na dogromadu 18 stacijach (m.dr.: RBB – ca. 13:30 góź., radnica – ca. 14:00 góź., Serbski dom – ca. 15:00 góź., Blechen Careé – ca. 15:30 góź., studnja na Godkojskej droze – ca. 16:00 góź., Serbski muzej – ca. 17:00 góź., Volks-und Raiffeisenbank – ca. 17:30 góź.) mógu měsćanarje a gósći wjasoły pśesěg live dožywiś.

Wót 18:00 góź. su wšykne pśijaśele serbskeje kultury wutšobnje pśepšosone do cafeterije Dolnoserbskego gymnaziuma, aby gromaźe ze ceptarjami a wuknikami ku muzice na Zapustowej diskotece rejowali a spódobny wjacor pśebywali.